Logo dark variant
Սեղմեք Enter՝ որոնման համար կամ ESC՝ փակելու համար
Օգոստոսի 28-ին «Կինոպարկ»-ում կայացավ «Գիտունոիդ» առաջին հայկական գիտական քոմեդիի փակ դիտումը: Արմենիա հեռուստաընկերության նոր նախագիծը՝ «Գիտունոիդ»-ը նոր ձևաչափ է հայկական եթերում. այն նպատակ ունի դառնալ դպրոցականների հեռուստաընկերը՝ երեխաներին տեղափոխելով անիմացիոն աշխարհ:
Նոր նախագծի դերասանական կազմում են Անահիտ Կիրակոսյանը, Իշխան Ղարիբյանը, Մհեր Գրիգորյանը, Լիլիթ Թոխատյանը, Վահագն Գասպարյան և այլոք: Նախագծի պրոդյուսերը Ռոբերտ Մարիտիրոսյանն է, սցենարիստները Վահան Մովսեսյանը, Ջեյմս Նազարյանը, Խորեն Թևանյանը, ռեժիսորը Կարեն Ամյանն է: Նախագծի գաղափարի հեղինակը և անիմացիոն հատվածի պատասխանատուն «Մեդիա Սթրիմ» գործակալությունն ու «L17» անիմացիոն ստուդիան են:
Մանկական ճանաչողական-ժամանցային նախագիծը պատմում է այլմոլորակային կայսրության արքայազն Բետելգերնորապեքս 398-րդի մասին, որի աստղաթիռը վթարային վայրէջք է կատարում Երկիր մոլորակի վրա, մասնավորապես՝ Լևոնյանների տան մոտակայքում: Պարզվում է, որ միջգալակտիկական հյուրն ամեն բան գիտի մեր մոլորակի մասին: Բացառիկ գիտելիքների համար նոր ընկերները՝ Արտեմն ու Գիսանեն, նրան կոչում են Գիտունոիդ: Այլմոլորակային հյուրի օգնությամբ երեխաները յուրաքանչյուր սերիայում գիտապտույտով հայտնվում են անիմացիոն աշխարհում և ավելին իմանում որևէ երևույթի մասին. ինչպե՞ս է գործում մարդու օրգանիզմը, ի՞նչ է ֆոտոսինթեզը, ինչպե՞ս են կառուցվել եգիպտական բուրգերը և այլն:
Նախագծում անիմացիոն հատվածն իրականացրել է «Մեդիա Սթրիմ» գործակալությունը, դրա ղեկավար Կարեն Մաթոսյանը նշում է, որ պատասխանատու գործ են արել՝ դաշտում համարձակ քայլ կատարելով. «Հայկական հեռուստատեսությունում այս միքսն անելը բավականին համարձակ քայլ էր, բայց Արմենիա TV-ին գնաց դրան, և մենք ստացանք, այսպես ասած, շատ լավ խառնուրդ: Անիմացիոն հատվածը բարդ էր, որովհետև պետք էր այդ կերպարներին ստանալ, հետո այնպես անել, որ դրանք շատ արագ սիրվեն բոլոր տարիքային խմբերի կողմից: Ծավալուն աշխատանքի արդյունքում նոր ժանր առաջացավ՝ համադրվեց սիթքոմը և անիմացիոն ֆիլմը: Մի քանի օրից արդեն եթերում կլինի, և կարծում եմ՝ բավականին կսիրվի: Իրականում նպատակն էր այնպես անել, որ այն ծնողները, որոնք ասում են՝ դուրս արի հեռուստացույցի, հեռախոսի միջից, այս դեպքում ասեն՝ միացրու հեռուստացույցը և նայիր «Գիտունոիդ»-ը: Կարծում եմ նախագիծը իրապես հաջողված է»:
Նախագիծը Արմենիա Հ/Ը եթերում կլինի սեպտեմբերի 3-ից:
Նյութը՝ Լուս Ավագյանի /showbiz.am/
