Ջենիֆեր Լոպեսը երեւանյան մենահամերգին ստիպեց իր հետ երգել, սեր խոստովանեց Հայաստանին ու հուզվեց Երեւանի ջերմ ընդունելությունից
«Արմենպրես»-ի հաղորդմամբ՝ Լոպեսը Երևանում էրUp All Night համերգային շրջագայության շրջանակում և ասաց, որ երջանիկ է լինել Հայաստանում, առաջին անգամ հանդիպել տեղի երկրպագուներին: Հենց համերգի սկզբում նա խոստացավ հրաշալի երեկո նվիրել ներկաներին ու հավատարիմ մնաց խոստմանը:
Լոպեսը տարբեր մեկնաբանություններով, նոր գործիքավորմամբ ու մոտեցումներով կատարեց On the Floor, Let's Get Loud, Waiting For Tonight, Get Right, I'm Real և մի շարք այլ երգեր, տպավորեց իր շքեղ կոստյումներով, անսպառ էներգիայով, պարային շոուով և վարակեց լավ տրամադրությամբ: Նրան այդ հարցում օգնեցին բարձրակարգ երաժիշտներն ու պարային խումբը, որը Երևան էր ժամանել Լոպեսի հետ:
Հուլիսի 24-ին Ջենիֆեր Լոպեսը հյուրախաղերի ընթացքում տոնեց ծննդյան 56-ամյակը: Հենց այդ առթիվ նա կատարեց նաև Birthday երգը և ամբողջ համերգի ընթացքում պարբերաբար հիշեցրեց, որ իր տարեդարձն է եղել, և խոստովանեց, որ իրեն շատ է սիրում: Չմոռացավ ասել, որ սիրում է նաև այն մարդկանց, երկրպագուներին, որոնք գնահատում են իրեն, իր կողքին են:
Մինչ վերջին՝ Free երգը կատարելը Լոպեսն ընդգծեց, որ երևանյան երեկոն հավերժ կհիշի: «Երախտապարտ եմ իմ երաժիշտներին, պարողներին, իմ ամբողջ անձնակազմին, որոնց միջոցով կարողացանք ձեզ նվիրել այս երեկոն: Ես չեմ սիրում խորհուրդներ տալ, սակայն մի բան շատ եմ ցանկանում ասել՝ զբաղվեք նրանով, ինչը ձեզ դուր է գալիս, պահպանեք այն մարդկանց, որոնց սիրում եք, որովհետև ես հավատում եմ, որ մենք երջանիկ ենք նրանց շնորհիվ և այն ազատության, որն ունենք: Մաղթում եմ՝ դուք այնքան ազատ զգաք ձեզ ու երջանիկ, որքան ես եմ ինձ այսօր զգում ձեր շնորհիվ: Անչափ շնորհակալ եմ, Հայաստան: Պարզապես ազատ եղեք»,-եզրափակեց երգչուհին:
Նախքան բեմից հեռանալը Ջենիֆեր Լոպեսը իջավ ներքև, լուսանկարվեց երկրպագուների հետ, վերցրեց իր համար նախատեսված ծաղիկներն ու անմոռանալի դարձրեց իր հետ հանդիպումը:
Ավելի վաղ համերգի կազմակերպչական աշխատանքներն իրականացնող «Դոպինգ սփեյս» ընկերությունը հայտնել էր, որ Լոպեսի մենահամերգի մասնակիցներից 15 հազարը արտերկրից են ժամանել, ինչ արդյունքում երևանյան հյուրանոցներում գրեթե տեղ չի եղել: Երկրպագուներից շատերը հյուրընկալվել են Ծաղկաձորի, Սևանի հյուրանոցներում:
