Logo dark variant
Սեղմեք Enter՝ որոնման համար կամ ESC՝ փակելու համար
Ինչպես արդեն հայտնել էինք, կյանքից հեռացել է Հակոբ Պարոնյանի անվան երաժշտական կոմեդիայի պետական թատրոնի դերասան, ՀՀ վաստակավոր արտիստ Արա Դեղտրիկյանը։
Դերասանի գործընկերները ցավակցական գրառումներ են արել սոցցանցերի իրենց էջերում ու նրա հետ լուսանկարներ հրապարակել:
Դերասանուհի Անահիտ Կիրակոսյանը ֆեյսբուքյան իր էջում կիսվել է հետևյալ գրառմամբ.
«Չգիտեմ, խոսքեր չկան ասելու, էլի ցավ, հազար ափսոս մեր ավագ ընկեր, հրաշք մարդ տեսակ, պարոն Դեղտրիկյան»:
Դերասանուհի Ալինա Մարտիրոսյանը ևս ֆեյսբուքյան իր էջում գրառում է արել.
«Լույսերի մեջ մնաս Արա ջան, լավ արտիստ և լավ մարդ»:
Սցենարիստ, հաղորդավար Դիանա Գրիգորյանն իր ինստագրամյան էջում հրապարակել է համատեղ լուսանկար և գրառում արել.
«Անկարող եմ խոսել և արտահայտել այն ինչ զգում եմ այս պահին: Ես միշտ սիրով եմ աշխատել նրա հետ, նրա հետ սիրով աշխատում էր իմ խումբը, որովհետև նա միշտ սեր էր տարածում: Բախտ եմ ունեցել նրա հետ գտնվել նկարահանման հրապարակում իբրև դերասանուհի: Լավ գործընկեր, հոգատար ընկեր, բարի անսահման, նկարահանման հրապարակում հումորի պակաս չէր լինում, եթե նա ներկա էր:
Հիշում եմ, թե ինչպես էր մեզ համար համեղ ուտեստներ պատրաստում, որքան համեղ էր պատրաստում: Տոն էր ինձ համար, երբ գիտեի, որ այդ օրը նրա հետ եմ նկարահանման: Հումորի մեծ չափաբաժնով, անսահման բարի, աննկարագրելի շռայլ, հոգատար, սրտացավ, լույս մարդ, վարպետ իր գործում:
Հիշում եմ` որքան հոգատար էր իմ նկատմամբ, երբ կոտրված ոտքով գնում էի նկարահանման: Նա ուներ ուրույն ձեռագիր ոչ միայն կինոյում և թատրոնում այլ նաև` կյանքում: Բազմաբովանդակ մարդ, արտիստ, ընկեր:
Վերջին անգամ նրա տարբերվող ձայնը լսեցի փետրվարի 14 ին` ծննդյան օրը: Այնքան լիահույս էի, որ ապաքինվելու է, խոստացավ, որ մի փոքր լավ զգալու դեպքում անպայման կհանդիպենք… ավաղ:
Նա մի արտիստ էր, որ ի զորու էր մխիթարել ու բժշկել մարդկանց հոգիներն իր մեծագույն զենքերով` տաղանդով ու ծիծաղով»:
Դերասան Արմեն Մարգարյանը ֆեյսբուքյան իր էջում հրապարակել է Արա Դեղտրիկյանի հետ լուսանկար, որին կից գրել է.
«Սունդուկյան թատրոնում Արայի հետ խաղացինք «Մակբեթ»-ում, նա` Մակբեթ, ես` Բանքո, լավ ժամանակներ էին, այդ ներկայացումը մտերմացրեց մեզ, բեմում ընկերներ լինելուց զատ` ընկերացանք նաև կյանքում: Շատ եմ ափսոսում, որ այդքան կենսախինդ և նվիրական արտիստը լքեց այս աշխարհը, ցավալի է»:
Երգչուհի Սոնա Շահգելդյանը ևս անդրադարձել է դերասանի մահվանը.
«Շատ ցավալի է, լավ մարդ ու լավ դերասան: Կյանքը շատ կարճ ու դժվարություններով լի է: Սիրեք իրար, մարդ մնացեք, բարի եղեք, ամեն բան սուտ է»,- ֆեյսբուքյան իր էջում գրել է երգչուհին:
