Հայտնիներ, ովքեր կյանքից հեռացան 2024-ին

Ամեն տարին, ցավոք, ավարտվում է նաև կորուստներով։ 2024-ին եղան կորուստներ տարբեր բնագավառների հայտնիների շրջանում։

Ամփոփելով 2024-ը ELSTYLE.am-ը ներկայացնում է հայկական շոու բիզնեսի այն ներկայացուցիչներին ովքեր կյանքից հեռացել են 2024-ին։

Փետրվարի 6-ին կյանքից հեռացավ «Կարին» ավանդական երգի-պարի խմբի հիմնադիր և գեղարվեստական ղեկավար, Հայաստանի մշակույթի վաստակավոր գործիչ և Արցախյան պատերազմի մասնակից Գագիկ Գինոսյանը։

Մահվան պատճառը սրտի կաթվածն էր։ Նա 58 տարեկան էր։

45 տարեկանում փետրվարի 10-ին կյանքից հեռացավ հայտնի հանդիսավար, շոումեն, երգիչ ԱլիկՀակոբյանը։

Նշվում է, որ Ալիկ Հակոբյանի մոտ հանկարծակի առաջացել է սրտի հետ կապված խնդիր։

Ջրասուզակները 2 օր որոնողական աշխատանքների արդյունքում  հունիսի 3-ին Սևանա լճում հայտնաբերեցին ջրահեղձ եղած կոմպոզիտոր Անահիտ Մնացականյանի մարմինը։

Հունիսի 22-ին կյանքից հեռացավ դերասանուհի Լալա Մնացականյանը։ 

Լալա Բաբկենի Մնացականյանը ծնվել է 1957թ․՝ Երևանում՝ դերասանուհու և մաթեմատիկոսի ընտանիքում։ Մայրը՝ Էլիզա Գյուլեսերյանը, եղել է բեմական խոսքի դոցենտ, հայրը՝ Բաբկեն Մնացականյանը՝ մաթեմատիկոս, մաթեմատիկական գիտությունների թեկնածու, դոցենտ։

Ընտանիքում եղել է երրորդ աղջիկը։ Սովորել է Երևանի N 78 դպրոցում։ Ավարտելով այն՝ ընդունվել է Երևանի պետական գեղարվեստա-թատերական ինստիտուտի թատրոնի և կինոյի դերասանական բաժինը, որն ավարտել է 1978 թվականին կարմիր դիպլոմով։

Խաղացել է բազմաթիվ դերեր թատրոնում, կինոյում և հեռուստատեսությունում։ Հետաքրքիր դերակատարումներով հանդես է եկել տարբեր թատրոններում՝ Երևանի Երիտասարդական Էքսպերիմենտալ Թատրոն, Վանաձորի Հովհաննես Աբելյանի անվան պետական դրամատիկական թատրոն, Գաբրիել Սունդուկյանի անվան ակադեմիական թատրոն, «Մետրո» թատրոն, Մհեր Մկրտչյան արտիստական թատրոն։ 140 մանրապատումների սցենարիստ է և դերակատար։

1991 թվականից բեմական խոսք էր դասավանդում Երևանի Կինոյի և թատրոնի պետական ինստիտուտում, բեմական խոսքի պրոֆեսոր էր։ Համահեղինակ է «Գեղարվեստական խոսքի մատուցման արվեստը» ուսումնական ձեռնարկի, որն առաջին և առայժմ միակ դասագիրքն է հայերենով։

Դերասանուհին 66 տարեկան էր։

Թարմ լուրերը Telegram-ում