Logo dark variant
Սեղմեք Enter՝ որոնման համար կամ ESC՝ փակելու համար
Օրեր առաջ մեկնարկել են ռեժիսոր, պրոդյուսեր Ելենա Արշակյանի նոր ֆիլմի նկարահանումները: «Նոր տարվա կինո»-ի սցենարի հեղինակն Անահիտ Մխիթարյանն է:
Ռեժիսորը խոստովանել է, որ երեք տարի է՝ նման գաղափար ունեին, սցենարի վրա էլ երկար են աշխատել. «Մեզ համար երազանքի նախագիծ է: Ուզում էինք ստեղծել ֆիլմ հենց այս սցենարով, ուղերձով եւ գաղափարով: Առայժմ շատ մանրամասներ չենք կարող պատմել, բայց ինձ եւ Անահիտի համար մեր կյանքի կարեւոր ու պատասխանատու աշխատանքն է, որտեղ իրեն կգտնի յուրաքանչյուր հայ»:
Երբեք չդադարեք երազել՝ սա է ֆիլմի հերոսների գլխավոր ուղերձներից մեկը. «Երազանքներն իրականանում են ամենաանհավանական պահերին: Սա ֆիլմ է, որը ցույց է տալիս, որ ճշմարիտը, ազնիվը հաղթում է»:
Նկարահանումներն իրականացվելու են Հայաստանի մարզերում. «Ներկայացվելու է Լոռու, Գեղարքունիքի, Շիրակի, Սյունիքի եւ մյուս մարզերի կոլորիտը, բարբառը, հումորները: Հատկանշական է, որ դերասանները, որ ընդգրկված են ֆիլմում, ներկայացնում են հենց իրենց ծննդավայր մարզը»,-պատմել է Ելենա Արշակյանը եւ հավելել, որ նկարահանումները կտեւեն մինչեւ աշուն, իսկ դերակատարների անունները կբացահայտեն ավելի ուշ:
